टीकापुर २२ भदौ /
टीकापुर नगरपालिका वडा नं. १ ब्लक नं. ३२ स्थित एक घरमा चोरी भएको छ ।
स्थानीय छत्र धामीको घरमा कोहि नभएको समयमा घरको ढोकाको ताला तोडेर गरगहना र नगद चोरी भएको हो । यहीँ भदौ १९ गते राती छोरा बिरामी भएपछि छोराको उपचारको लागि नेपालगन्ज गएको समयमा घरमा रहेको करिब १० तोला सुन र तीन लाख ८२ हजार नगद चोरी भएको धामीले बताएका छन् । “एकाएक छोरा बिरामी भएपछि टीकापुर अस्पतालले नेपालगन्ज रेफर गर्दा १९ गते राती ९ बजेतिर निस्केका थियौं । श्रीमती सहित छोरालाई लिएर नेपालगन्ज जाँदा जेठो छोरालाई छिमेकीको घरमा छोडेका थियौं ।” उनले भने, “२० गते त्यहीँ बस्नुपर्यो । २१ गते करिब तीन बजेतिर घर पुग्दा घरमा भएको सबै धनमाल चोरले लिइसकेको थियो ।”
उनका अनुसार पसलमा भएको रकम पनि घरमा ल्याएर राखेका थिए भने व्यापारीलाई पैसा दिन सजिलो हुने हुँदा पैसा घरमै राखेका थिए । केही दिन अगाडी मात्रै तीज आएका कारण बाहिर राखेको सुन पनि घरमा ल्याएर राखेको उनको भनाइ छ ।
उता ईलाका प्रहरी कार्यालय टीकापुरका प्रहरी प्रमुख प्रहरी नायब उपरीक्षक विश्वराज अधिकारीले घटनाको अनुसन्धान प्रहरीले सुरु गरेको बताएका छन् । उनले चोरीना संलग्नलाई खोजीमा लागेको बताए ।
लाखौंको गरगहना सहित नगद चोरी
