टीकापुर पार्क प्रवेश शुल्कमा वृद्धि, फोटोग्राफर आन्दोलनमा

शेयेर गर्नुहोस

झलनाथ खनाल, टीकापुर ०५ साउन /
टीकापुर नगरपालिकाले टीकापुर पार्कको प्रवेश शुल्क बढाएको छ ।
नगरपालिकाको आर्थिक ऐन २०८२ अन्तर्गत टीकापुर पार्क प्रवेश शुल्क बढाएको पाइएको हो । यसभन्दा पहिले स्वदेशी नागरिकहरूले तिर्दै आएको प्रती व्यक्ति ३० रुपैयाँलाई बढाएर ५० रुपैयाँ पुर्याइएको छ । त्यसैगरी अपाङ्गता भएका व्यक्ति, बिद्यार्थी र जेष्ठ नागरिकहरूलाई भने प्रती व्यक्ति ३० रुपैयाँ कायम गरिएको छ । पाँच वर्ष भन्दा कम उमेरका बालबालिकाको हकमा भने नि:शुल्क बनाइएको छ ।
त्यस्तै विदेशी नागरिकहरूमा सार्क मुलुक भित्रका पर्यटकका लागि दुई सय प्रवेश शुल्क तोकिएको छ भने अन्य विदेशी पर्यटकको हकमा चार सय तोकिएको छ । पार्क भित्रको वीरेन्द्र विश्राम बाटिका प्रवेश गरेको छुट्टै शुल्क तय गरिएको छ । जसमा पनि बिद्यार्थी, जेष्ठ नागरिक तथा अपाङ्गता भएका व्यक्तिहरुलाई बाटिका प्रवेशका लागि १० रुपैयाँ लाग्ने छ भने अन्य स्वदेशी पर्यटकलाई २० रुपैयाँ शुल्क लाग्ने छ । विदेशी नागरिक सार्क मुलुकभित्रकोलाई एक सय र बाहिरको पर्यटकलाई दुई सय शुल्क तोकिएको छ ।
आर्थिक ऐनले पिकनिक स्थलको दररेटमा परिवर्तन गरेको छ । अब २५ जनाभन्दा कमको समुहले तीन सय ५० रुपैयाँ, ५० जनासम्मको समुहले पाँच सय रुपैयाँ र त्यसभन्दा माथिको समुहले ७ सय ५० रुपैयाँ पिकनिक स्थलको शुल्क तिर्नुपर्ने छ । यसभन्दा पहिले नगरपालिकाले विद्यार्थी, जेष्ठ नागरिकहरुबाट १५ रुपैयाँका दरले प्रवेश शुल्क उठाउँदै आएको थियो भने अन्य नागरिकहरूका लागि ३० रुपैयाँ शुल्क कायम गरिएको थियो ।
त्यसैगरी अन्य विषयमा पनि शुल्क वृद्धि भएको छ । यसभन्दा पहिले दैनिक एक सय रुपैयाँ तिरेर व्यावसायिक फोटोग्राफी गर्दै आएका फोटोग्राफरले अबदेखि दैनिक दुई सय रुपैयाँ तिर्नुपर्ने भएको छ । शिक्षा सम्बन्धि फिल्म सुटिङका लागि दुई हजार शुल्क तिर्नुपर्ने छ भने अन्य व्यावसायिक फिल्मको लागि पाँच हजार शुल्क तोकिएको छ ।
एकै वर्षमा ९३ लाख राजश्व संकलन
टीकापुर नगरपालिकाले गत आर्थिक वर्ष २०८१/०८२ मा टीकापुर पार्कबाट ९३ लाख भन्दा बढी राजश्व संकलन गरेको छ । नगरपालिकाले दिएको तथ्यांकअनुसार गत वर्ष ९३ लाख ४४ हजार चार सय १० रुपैयाँ राजश्व संकलन भएको छ । आर्थिक वर्ष २०८०/०८१ मा नगरपालिकाले पार्कबाट ६३ लाख ९७ हजार एक सय ७५ रुपैयाँ राजश्व संकलन गरेको थियो ।
पार्कमा गत वर्ष दुई लाख १८ हजार दुई सय ८ जना स्वदेशी नागरिकहरूले पार्कको अवलोकन गरेका छन् । जसबाट ६५ लाख ४६ हजार दुई सय ४० रुपैयाँ राजश्व संकलन भएको छ भने ३५ हजार दुई सय ६० जना विद्यार्थी तथा जेष्ठ नागरिकहरूले पार्क अवलोकन गरेका छन् । जसबाट नगरपालिकाले पाँच लाख ५८ हजार ९ सय राजश्व संकलन भएको देखिन्छ । सवारीसाधन पार्किङबाट मात्रै ८ लाख ३७ हजार एक सय राजश्व उठेको छ । पिकनिक स्पोट, फोटोग्राफी, क्यामरा लगायत विविधबाट १४ लाख ३२ हजार एक सय ७० रुपैयाँ संकलन भएको छ ।
गतवर्षबाट पार्कमा हुने राजश्व चुहावट रोकिएका कारण राजश्वमा वृद्धि भएको नगरपालिकाका राजश्व शाखा प्रमुख नन्द केसी बताउँछन् । उनले अन्य व्यवस्थापनको पाटोलाई पनि व्यवस्थित गरेका कारण राजश्व बढेको बताउँदै आगामी दिनमा अझै पार्कबाट राजश्व बढ्ने आकलन गरेका छन् । “चुहावट लगायतका कुराहरू कम हुँदै गएका छन् । अन्य क्षेत्रबाट प्रवेश गर्ने बाटोहरु बन्द भएका छन् ।” उनले भने, “अझै यसलाई व्यवस्थित र निगरानी बढाउन सक्यो भने राजश्व बढ्छ ।”
शुल्क दोब्बर भएपछि फोटोग्राफर आक्रोशित
टीकापुर नगरपालिकाले पार्क भित्र व्यावसायिक फोटोग्राफीको शुल्क चालू आर्थिक वर्षबाट दोब्बर बनाएको छ । यसभन्दा पहिले दैनिक एक सय रुपैयाँ तिर्दै आएका व्यावसायिक फोटोग्राफरले अहिले दुई सय तिर्नुपर्ने भएपछि स्थानीय सरकारले आफुहरुले गरि खाएको देख्न नसकेको आरोप लगाएका छन् । उनीहरूले स्थानीय सरकारले आफ्नो क्षेत्रमा रोजगारीका अवसर सिर्जना गर्नुको साटो स्वरोजगार बनेका युवाहरूलाई पनि बेरोजगार बनाइने काम गरेको गुनासो गरे ।
दुई वर्षदेखि पार्कमा व्यावसायिक फोटोग्राफीको काम गर्दै आएका नैन बहादुर चौधरीले नगरपालिकाले आफुहरु माथी प्रतिशोधको भावना लिएको बताएका छन् । उनले एकएक शतप्रतिशत शुल्क वृद्धिले आफुहरुलाई हतोत्साहित बनाउएको बताउँदै त्यसलाई पुनःबिचार गर्नुपर्ने बताए । “अहिले ३०/३६ जना व्यावसायिक रुपमा लागेका छौँ । आफ्नो अध्ययनसँगै रोजगारीको माध्यम बनाइरहँदा एकाएक मासिक तीन हजारबाट ६ हजार पुर्याउँदा के गर्ने भन्ने स्थितिमा पुर्याएको छ ।” उनले भने, “काम छोडौं भने चारपाँच लाखको लगानी गरेर क्यामरा ल्याइएको छ । ऋण तिर्न सकिएको छैन । ६ हजार नगरपालिकालाई दिएर त्यो अनुसारको आम्दानी हुने स्थिति छैन ।”
टीकापुरको खड्ग स्मृति माद्यामिक बिधालयबाट कक्षा १२ को परिक्षा दिएर अहिले त्यहीँ पार्कमा फोटोग्राफीको काम गर्दै आएका छन् । उनले अरुको क्यामरा भाडामा लिएर चलाउँछन् । खासगरी सिजन नभएको समयमा भाडा तिर्न मुस्किल हुने स्थितिमा नगरपालिकालाई दिने पैसा उठाउन पनि गाह्रो हुने उनको भनाई छ । “अब भाडाको क्यामरा फिर्ता गरेर बाहिर कतै कमाउन जानुपर्ला । ६ हजार नै तिरेर काम गर्न सक्ने स्थिति छैन ।” उनले भने, “रोजगारी सिर्जना गर्छु भन्ने जनप्रतिनिधि भएका रोजगारीका बाटाहरु पनि बन्द गर्न लागे ।”