समाधान समाचार, टीकापुर १० साउन/
लामो समयको प्रयास पछि टीकापुर नगरपालिकालाई ठेला खोका मुक्त नगरपालिका बनाइएको थियो ।
केही वर्ष पहिले खोका ठेला मुक्त भएको नगरपालिकाले नगरको शोभा बिग्रने गरेर कसैले व्यावसायिक साइन बोर्ड राख्न नपाइने भन्दै त्यस्ता बोर्डहरु समेत हटाएको थियो । त्यतिमात्र होइन नागरिकहरूलाई जनचेतना फैलाउने बोर्डहरु समेत सिमित क्षेत्रमा राख्ने भन्दै हटाइएका थिए । आजसम्म आइपुग्दा नगरपालिकाका सार्वजनिक स्थानहरू व्यावसायिक प्रयोजनका लागि प्रयोग गरिएका साइन बोर्डहरुले भरिन थालेका छन् । सुन्दरताको लागि कसैले त्यस्ता कार्यलाई विस्थापित गर्ने र अहिले त्यसतर्फ कसैले ध्यान नदिँदा बजारको सुन्दरतामा दाग लाग्न थालेको छ ।
अहिले बजारमा मुख्य चोकहरुमा वैदेशिक अध्ययनका लागि बाहिर जानेहरुलाई सुवर्ण अवसर भन्ने शिर्षकका ठुला साइन बोर्ड ठाउँठाउँमा लगाइएका छन् । त्यतिमात्र होइन, टीकापुर अस्पताल रोडमा डेण्टल केयर होमका सडक नै छाप्ने खालका बोर्डहरु लगाइएको वर्षौं भयो । त्यसको बीचमा नगरपालिकाका पदाधिकारीहरुले कैयौंपटक बजारको अनुगमन गरे तर ती प्रचारका लागि राखिएका साइन बोर्डहरु हटाउने विषयमा कसैको पनि ध्यान गएको पाइएन ।
टीकापुर नगरपालिकाका नगर प्रमुख रामलाल डगौंरा थारुले बजारको सौन्दर्यता हराउने गतिविधि नगरपालिकाको लागि सहि नहुने बताउँदै त्यसलाई तुरुन्तै हटाइने बताएका छन् । “हामिले कसैलाई पनि व्यावसायिक प्रयोजनका लागि सार्वजनिक स्थानमा साइन बोर्ड राख्न भनेका छैनौं । यदि राखिएको पाइयो भने त्यसलाई हामी हटाउछौं ।” नगर प्रमुख थारुले भने, “पहिला आग्रह गर्छौं । आग्रहलाई बेवास्ता गरेको खण्डमा बल प्रयोग गरेर भएपनि त्यस्ता साइन बोर्डलाई हटाउँछौ ।” उनले जसरी पनि टीकापुरलाई सुन्दरताको शहरको रुपमा स्थापित गर्नका लागि नगरपालिका लागिपरेको बताएका छन् । उनले नगरपालिकाको नियम विपरीत कार्य गर्नेलाई कारबाहीको दायरामा ल्याइने बताएका छन् ।
नगरपालिकाको बजार क्षेत्रमा अवैध रुपमा सञ्चालन हुँदै आएका ईन्स्टिच्युटहरुलाई समेत बन्द गरिने बताउँदै नगर प्रमुख थारुले शिक्षालाई व्यावसायिक बनाउन नहुने बताएका छन् । उनले गुणस्तर शिक्षामा आफुहरु लागिपरेको भन्दै दर्ता बिना मौसम अनुसार सञ्चालन हुने ट्युसन सेन्टरहरुको सुक्ष्म अनुगमन भैरहेको बताएका छन् । अहिले टीकापुरमा थुप्रै ईन्स्टिच्युटहरु सञ्चालनमा आएका छन् । दर्ता एक ठाउँ गर्ने तर ठाउँठाउँमा सिमित अवधी बसेर युवाहरूलाई प्रलोभनमा पारेर वैदेशिक रोजगारीमा प्रेरित गर्ने काम गर्दै आएका छन् । “कसैले नियम कानुनमा रहेर राज्यलाई तिर्नुपर्ने कर तिरेर खोलिएका ईन्स्टिच्युटहरु छन् भने ठिक छ । एक ठाउँमा दर्ता भएका तर व्यावसायिक रुपमा ठाउँठाउँमा शाखा विस्तार गर्ने र राज्यलाई ठग्ने ईन्स्टिच्युटहरुलाई हामी चाडै निरुत्साहित गर्छौं ।”
नगर प्रमुख थारुले नगरपालिकाले शिक्षा नीति बनाई नसकेको बताउँदै शिक्षा नीति बनाइसकेपछी शिक्षालाई सर्वसुलभ र गुणस्तरीय बनाउनमा नगरपालिका लागिपर्ने बताएका छन् । ” पनि शिक्षामा समस्या देखिएका छन् । शिक्षा नीति बनेपछि सबै समाधान भएर जानेछन् ।” नगर प्रमुख थारुले भने, “शिक्षा नीति नबन्दा सम्म पनि राज्यको निगरानी भन्दा बाहिर रहेकाको निगरानी गर्ने र शिक्षालाई व्यावसायिकबाट सर्भसुलभ बनाइने छ । र सामुदायिक बिधालयमा अध्यापन गराउँदै आएका शिक्षकहरुले तिनै बिद्यार्थीलाई ट्युसन पढाउन पाउने छैनन् ।”
