कक्षा १० का विद्यार्थीलाई विदाई

शेयेर गर्नुहोस

दिपक बहादुर विश्वकर्मा, टीकापुर ०८ चैत /
टीकापुर नगरपालिका वडा नं. १ स्थित मेरी गोल्ड एकाडेमीमा कक्षा १० मा अध्ययनरत विद्यार्थीहरूलाई एक कार्यक्रमका बीच बिदाइ गरिएको छ ।
विद्यालयले एसईईको परिक्षाको शुभकामना दिँदै शनिबार उनीहरूको उज्ज्वल भविष्यको कामना सहित बिदाइ गरिएको हो । कार्यक्रममा विद्यार्थीहरूले विद्यालयमा बिताएको समयलाई जीवनकै महत्वपूर्ण र अविस्मरणीय अनुभवका रूपमा स्मरण गरेका थिए । उनीहरूले यहाँ अध्ययन गर्ने क्रममा शैक्षिक ज्ञानसँगै व्यवहारिक सीप र अनुशासन सिक्ने अवसर पाएको बताए । शिक्षकहरूको माया, साथ र मार्गदर्शनले आफ्नो व्यक्तित्व विकासमा महत्वपूर्ण भूमिका खेलेको भन्दै विद्यार्थीहरूले बिधालय प्रति कृतज्ञता व्यक्त गरेका थिए ।
विद्यालयकी प्रिन्सिपल देनकला विष्टले विद्यार्थीहरूको विदाई कार्यक्रममा बोल्दै उनीहरूको उज्ज्वल भविष्यको कामना गरेकी छन् । “विद्यालय केवल पढाइ हुने स्थान मात्र होइन, यो व्यक्तित्व निर्माण गर्ने थलो पनि हो ।” उनले भनिन्, “यहाँ सिकेका ज्ञान, अनुशासन र मूल्यहरूलाई जीवनमा उतार्न सकेमा तपाईंहरू अवश्य सफल बन्नुहुनेछ।” उनले मेहनत, निरन्तरता र आत्मविश्वासका साथ अगाडि बढ्न विद्यार्थीहरूलाई सुझाव दिएकी छन् ।
त्यस्तै, कक्षा १० की विद्यार्थी रेजिना विकले विद्यार्थीहरूको तर्फबाट मन्तव्य व्यक्त गर्दै विद्यालयप्रति आभार प्रकट गरिन् । “हामीले यस विद्यालयमा धेरै कुरा सिक्ने अवसर पायौं । शिक्षकहरूको माया, साथ र मार्गदर्शन सधैं सम्झिरहनेछौं ।” उनले भनिन्, “विद्यालय छोड्दा दुःख लागिरहेको छ, तर यहाँबाट पाएको ज्ञान र आत्मविश्वासले भविष्यमा अघि बढ्न सहयोग गर्नेछ। सबै शिक्षक तथा विद्यालय परिवारलाई धन्यवाद।”
कार्यक्रममा शिक्षकहरूले पनि विद्यार्थीहरूको उज्ज्वल भविष्यको कामना गर्दै अनुशासन, मेहनत र निरन्तरताका साथ अगाडि बढ्न सुझाव दिएका छन्। अन्त्यमा, विद्यार्थीहरूले सम्पूर्ण शिक्षक, कर्मचारी तथा विद्यालय परिवारप्रति धन्यवाद ज्ञापन गर्दै कार्यक्रम सम्पन्न भएको थियो।