जनशक्ति व्यवस्थापनसँगै उपचारमा निकै सहज

शेयेर गर्नुहोस

झलनाथ खनाल, टीकापुर १८ साउन /
कैलालीको टीकापुर अस्पतालमा स्वास्थ्य उपचार सेवामा विस्तार भएसँगै उपचारका लागि बाहिर गएर स्वास्थ्य उपचार गर्नुपर्ने बाध्यता कम हुँदै गएको छ । अस्पतालमा विशेषज्ञ सेवा विस्तारसँगै उपचारका लागी नेपालगन्ज, धनगढी लगायत जानुपर्ने बाध्यता कम हुँदै गएको हो ।
टीकापुरका खुशीराम चौधरीले विगतमा जस्तो सामान्य उपचारका लागि बाहिर जानुपर्ने बाध्यता कम भएको बताउनुहुन्छ । “पहिला उपचारका लागि जाँदा राम्रोसँग उपचार हुन्थेन । अस्पतालको फार्मेसीमा औषधि पाउने कुरा त धेरै परको कुरा थियो ।” उहाँ भन्नुहुन्छ, “अहिले उपचार पनि छ । फार्मेसीमा औषधि पनी । नागरिकहरुलाई ठूलो राहत भएको छ ।”
बर्दिया गेरुवा गाउँपालिकाका जंगबहादुर चौधरी बुवाको उपचारका लागि टीकापुर अस्पतालमा आउनुभयो । उहाँले बाहिर गएर पाउने सेवा टीकापुरमा पाउँदा यातायातमा लाग्ने ठुलो रकम बचत भएको बताउनुभयो । अस्पतालमा स्वास्थ्य जनशक्ति व्यवस्थापन सहित उपचारमा सहजता हुँदा दैनिक बर्दियाबाट उपचारका लागि आउनेको संख्या बढेको बताउनुभयो । “पहिले छिमेकीहरुमा उपचारका लागि नेपालगन्ज जाने कुरा चल्थ्यो भने आजकाल टीकापुर जाने कुरा चलेको बढी सूनिन्छ ।” उहाँ भन्नुहुन्छ, “म आफै पनि नेपालगन्ज जाने गर्थे, आजभोलि सामान्य समस्या आयो भने पनि टीकापुर पुग्छौं ।”
क्षमता भएको व्याक्ती नेतृत्वमा हुँदा काम गर्न समस्या छैन भन्ने कुराको उदाहरण यतिबेला टीकापुर अस्पताल बनेको छ । डेढ वर्ष पहिले अस्पतालमा दुईतीन जना विशेषज्ञले सेवा दिँदै आएको देख्न पाइन्थ्यो । त्यतिमात्र होइन सामान्य बिरामी भएर अस्पताल पुग्दा चिकित्सक भन्दा अगाडि एम्बुलेन्स पुग्ने टीकापुर अस्पतालमा यतिबेला अधिकांश समस्याको उपचार सम्भव भएको छ । अस्पतालले अहिले १० प्रकारको विशेषज्ञ सेवा प्रदान गर्दै आएको छ । अस्पतालसँग १७ जना विशेषज्ञ चिकित्सक छन् ।
अस्पतालमा दुईजना बाल रोग विशेषज्ञ, प्रसुती तथा स्त्रीरोग विशेषज्ञ तिनजना, एम. डी.जि. पि. एकजना, जनरल सर्जरी दुईजना, ऐनेस्थेसिया दुईजना,फिजिसीयन दुईजना, नाक, कान, घाँटीको एकजना विशेषज्ञ चिकित्सकले अस्पतालमा सेवा दिँदै आउनुभएको छ । त्यसैगरी हाडजोर्नीको तीनजना, रेडियोलोजिष्ट एकजना विशेषज्ञ चिकित्सक अस्पतालमा कार्यरत रहेको अस्पताल विकास समितिका अध्यक्ष झपट बहादुर सोडारीले बताउनुभएको छ । उहाँका अनुसार अस्पतालमा आठजना मेडिकल अधिकृत र दुईजना डेन्टल सर्जनले काम गरिरहनु भएको छ । त्यसमध्ये एकजना बालरोग विशेषज्ञ र एकजना प्रसुती तथा स्त्रीरोग विशेषज्ञ टीकापुर नगरपालिकाले व्यवस्थापन गर्दै आएको छ ।
चिकित्सकहरुको व्यवस्थापनसँगै संरचनागत रुपमा पनि अस्पताल बलियो बन्दै गएको छ । सुदुरपश्चिम प्रदेश सरकार र कोइकाको अस्पतालमा ठूलो सहयोग रहेको अध्यक्ष सोडारीको भनाई छ । “अस्पतालमा आइसियुका साथै भेन्टिलेटर पनि प्रयोगमा ल्याएका छौँ । उपचारका लागि चिकित्सकको व्यवस्थापनसँगै आवश्यक उपकरणको पनि व्यवस्था गर्न सफल भएका छौँ ।” अध्यक्ष सोडारीले भन्नुभयो, “अब अस्पतालमा सिटीस्केन सेवा जोड्न बाँकी छ । त्यसका लागि प्रदेश सरकारसँग समन्वय भैरहेको छ ।”
अस्पतालको इमर्जेन्सी कक्षमा सेवाग्राहीलाई लक्षित गर्दै एसी जडान गरिएको छ । अस्पतालको ओपिडी सेवा ८ बजेबाट सञ्चालन हुँदै आएको छ । जेष्ठ नागरिकहरूलाई लक्षित गरेर शनिबार पनि ओपिडी सञ्चालन अस्पतालले गर्दै आएको छ । “अस्पतालले विकासको एउटा चरण पार गरेको छ । अब भएको जनशक्तिलाई व्यवस्थापन गरेर स्वस्थ्य सेवा दिन सक्यो भने अस्पताल सफल भएको मान्न सकिनेछ ।” अध्यक्ष सोडारी भन्नुहुन्छ, “अब सिटीस्केन र छाला रोग विशेषज्ञ सेवाका लागि अस्पतालले समन्वय गर्दै आएको छ ।”
चिकित्सकलाई सहज रुपमा काम गर्ने वातावरण बनाउन सके जनशक्तिको समस्या नहुने अस्पतालका मेडिकल सुपरिटेन्डेन्ट डा. रेमकुमार राई बताउनुहुँन्छ् । उहाँले छोटो समयमा अस्पताल व्यवस्थापन समितिको इच्छाशक्तिले स्वस्थ्य क्षेत्रमा अस्पतालले ठूलो सफलता हासिल गरेको बताउनुभयो ।
टीकापुर लगायत आसपासमा छिमेकी पालिका र लुम्बिनी प्रदेशको बर्दिया जिल्लाका र कर्णाली प्रदेशको सुर्खेतबाट पनि अस्पतालमा उपचारका लागि आउने बिरामीको संख्यामा वृद्धि भएको छ । स्थानीय छिमेकी पालिकाले सहयोग गर्न सके अझै अस्पतालको स्तर वृद्धिमा सहज हुने अस्पताल प्रशासनको भनाई छ ।