टीकापुर १६ मंसिर / जानकी गाउँपालिका वडा नं. ३ मा बिहान बस दुर्घटना हुँदा १० जना घाईते भएका छन ।
टीकापुरबाट धनगढी जाँदै गरेको गोदावरी यातायातको सुपप्र ०१–००१ ज १४५० नम्बरको हायस ८ बजेतिर दुर्घटनामा परेको हो । दुर्घटनामा टीकापुर नगरपालिका ब्लक नम्बर १६ का ४६ वर्षकी निर्मलादेवी जैसी, लम्कीचुहा नगरपालिका वडा नम्बर १ भुरुवाका ५० वर्षका जनकराम चौधरी, कञ्चनपुरको पुनर्वास नगरपालिका वडा नम्बर ८ की काली सुनार गम्भीर घाइते भएका छन ।
यस्तै टीकापुर ब्लक ९ की सावित्रादेवी रावल, ब्लक १४ की ४५ वर्षकी देवेश्वरी महत्तो, १९ वर्षका शुभम महत्तो, व्लक १० कि ३५ वर्षकी टङ्की तिमिल्सेना, ब्लक १९ की शान्तिमाया शाही, गौरीगङ्गा नगरपालिकाको अण्डैयाकी अमृता बोगटी, पुनर्वास नगरपालिकाकी वडा नम्बर ८ की तारा सुनार समेत घाइते भएका छन ।
घाइतेहरुको टीकापुर अस्पतालमा उपचार भैरहेको छ । लम्कीचुहाका जनकराम सवार से ४ प ५८३१ नम्बरको मोटरसाइकललाई बचाउन खोज्दा बस दुर्घटनामा परेको ट्राफिक प्रहरीका बरिष्ठ हवल्दार इन्द्रसिंह डाँगाले जानकारी दिए । मोटरसाइकल चालक घाइते रहेका र गाडी चालकलाई प्रहरी नियन्त्रणमा रहेको टीकापुरका प्रहरी प्रमुख, प्रहरी नायव उपरीक्षक हेमबहादुर शाहीले जानकारी दिए ।
